روسی وزیرِ خارجہ نے ممکنہ جوہری تجربے کی تیاری کی تصدیق کر دی
ماسکو (نیوز ڈیسک): روسی وزیرِ خارجہ سرگئی لاوروف نے تصدیق کی ہے کہ صدر ولادیمیر پیوٹن کی جانب سے ممکنہ جوہری تجربے کی تیاری کے حکم پر عمل درآمد شروع کر دیا گیا ہے۔
روسی خبر رساں ایجنسی ’تاس‘ (TASS) کے مطابق، لاوروف نے بتایا کہ 5 نومبر کو سلامتی کونسل کے اجلاس کے دوران صدر کی ہدایت پر عمل جاری ہے اور جلد ہی عوام کو نتائج سے آگاہ کیا جائے گا۔
یہ پیشرفت اُس وقت سامنے آئی ہے جب امریکی صدر ڈونلڈ ٹرمپ نے اعلان کیا کہ امریکہ 33 سال بعد دوبارہ جوہری تجربات شروع کرے گا، تاہم یہ واضح نہیں کیا کہ یہ تجربات زیرِ زمین دھماکوں کی صورت میں ہوں گے یا نہیں۔
لاوروف نے کہا کہ روس کو تاحال امریکہ کی جانب سے اس اعلان کی کوئی وضاحت موصول نہیں ہوئی۔
ادھر، حالیہ ہفتوں میں روس اور امریکہ کے تعلقات میں شدید کشیدگی دیکھنے میں آئی ہے۔ صدر ٹرمپ نے یوکرین جنگ کے خاتمے میں ناکامی پر پیوٹن سے سربراہی اجلاس منسوخ کر دیا اور نئی پابندیاں بھی عائد کیں۔
بین الاقوامی ماہرین کے مطابق، یہ صورتحال ایک بار پھر دنیا کو سرد جنگ کے دور کی کشمکش کی یاد دلا رہی ہے، جہاں طاقت کے توازن کے لیے جوہری طاقت کا مظاہرہ مرکزی حیثیت رکھتا ہے۔