بھارت میں 1 لاکھ کی موٹر سائیکل پر 21 لاکھ روپے کا چالان — پولیس کی وضاحت سامنے آگئی
بھارتی میڈیا کے مطابق ایک دلچسپ واقعہ اُس وقت پیش آیا جب انمول سنگھل نامی شہری نے اپنی موٹر سائیکل کا ای چالان (E-Challan) دیکھا — اور حیران رہ گیا۔ وجہ یہ تھی کہ اس کی موٹر سائیکل کی قیمت صرف 1 لاکھ روپے تھی جبکہ چالان کی رقم 21 لاکھ 74 ہزار روپے درج تھی۔
پولیس کے مطابق انمول سنگھل نے ہیلمٹ نہیں پہنا تھا اور موٹر سائیکل کے ضروری کاغذات بھی موجود نہیں تھے، جس پر قانونی کارروائی کی گئی۔ تاہم، حیران کن طور پر چالان میں غلطی سے 20 لاکھ روپے زائد درج ہو گئے۔
سوشل میڈیا پر چالان کی تصویر تیزی سے وائرل ہوئی تو عوام میں دلچسپ تبصرے شروع ہو گئے۔ بعد ازاں پولیس حکام نے وضاحت دی کہ یہ معاملہ سب انسپکٹر کی غلطی کے باعث پیش آیا۔
حکام کے مطابق متعلقہ اہلکار نے موٹر وہیکلز ایکٹ کی سیکشن 207 کا حوالہ غلط انداز میں درج کیا، جس کی وجہ سے “207” اور “Rs 4,000” آپس میں جڑ کر “20,74,000” بن گئے۔
پولیس نے وضاحت جاری کرتے ہوئے کہا کہ انمول سنگھل کو صرف 4,000 بھارتی روپے کا جرمانہ ادا کرنا ہوگا، جبکہ متعلقہ اہلکار کو سخت تنبیہ کی گئی ہے تاکہ آئندہ ایسی غلطی دوبارہ نہ ہو۔
یہ واقعہ سوشل میڈیا پر وائرل ہو کر بھارت میں ای چالان سسٹم کی خامیوں پر ایک بار پھر بحث کا باعث بن گیا ہے